Song Search

Psycho-Motorische Wältschmärz-Reggae Nr.117

by Polo Hofer

on Schmetterding (1978), Polo Hofer SchmetterDing (1978)

Säg, isch es rächt
Wem e chrampfet wiene Chnächt
U sie zahle eifach schlächt
Sie gäbe eim keis Rächt
Me isch machtlos gäge d'Mächt
– Wo nid da sy für die Schwache!?

Säg, isch es fair
Wenn Eine imene Heer
Muess loufe, dass är's lehr'
Wie me umgeit mit em Gwehr
Für ds Vaterland u d'Ehr
– Ou wenn är's nid wott mache!?

Oder isch es no normal
We Eine seit: S'isch mir egal
We sie verrecke überall
Schliesslech geit's um ds Kapital
– U das sy wichtigeri Sache!?

Ja, die Herre forme d'Wält
Mit de Gsetz u mit em Gäld
Es isch e Witz – aber nid zum Lache!

Me seit, es müessi sy
Es syg ja immer e so gsy
Aber du gsehsch es halt nid y
Dass es nid cha anders sy
S'geit alls verby
– S'het kei Wärt umez'gniete

Du fragsch Di, was de isch
Mit däm Plakat wo seit Du bisch
Dä, wo cha ha, was nid isch,
Bis es gloubsch u alles gisch
Später merksch, dass bschisse bisch
– U de fragsch: Isch das alls, wo Dir chöit biete?

Du wottsch e Platz a dr Sunne ha
Drum passisch Di halt äbe a
Rächnisch chüel u schtelsch di Ma
Losisch all die Ratschläg a
– U was nid chasch choufe, chasch ja miete!

U Du dänksch: Vilech isch's glych
Ob me arm isch oder rych
Wül: Wär viel het, – het ou viel z'hüete!

(Instrumental Break)

Schpäter meinsch du schtöisch fescht
Hockisch nüm uf dünni Escht
Du hesch gnue vo fule Tescht
Bis öpper chunnt vo dyne Gescht
U Dir seit: Du bisch der Bescht
– U faht mit Dr afa schmuuse!

D'Liebi machi blind
Hesch scho ghört als chlyses Chind
U zwar us vielne Gründ
Aber me vergisst so gschwind
We eis Härz es anders find't
– Ume fragt de nid: Wie chunnt's ächt use?

Oh, Du gschpürsch die ganzi Pracht
Gschpürsch, was d'Liebi us dir macht
Wül, plötzlech bisch erwacht
Wäge dere länge Nacht
– Wo dir z'erscht Mal zäme syt ga pfuuse.

Aber plötzlech isch's verby
U was geschter no Dys isch gsy
Muesch scho hüt – wieder la suuse!

Plötzlech seisch, es isch mir z'viel
I hilfe nümme i däm Schpiel
I ha ganz es anders Ziel
Das isch nid my Läbesschtil
I wott nid ände im Asyl
– Mi schysst die verdammti Legerei a!

U was isch ächt de das
We Du hangisch a dym Glas
Keine kümmeret das
Wo Di plaget, fragt Di: Was?
Bis me Di findet uf dr Schtrass
– U Dir seit: Söttisch gschyder hei ga!

Chasch Di frage: Wär's ächt guet
Sone Nadle wyssi Gluet
Git Wermi oder Meut?
Bis de merksch wie's nächär tuet
– We Di chuum chasch uf dyne Bei ha!

Ja, Du weisch, es isch z'bequem
Z'säge es liegi am Syschtem
Es muess jede – sy Wäg elei ga!