Song Search

New Craas Massahkah

by Linton Kwesi Johnson

on Small Axe (Music Inspired By The Original TV Series) (2021)

(To the memory of the fourteen dead)

First di comin'
An di goin'
In an out af di pawty

Di dubbin
An di rubbin
An di rackin to di riddim

Di dancin'
An di scankin
An di pawty really swinging

Den di crash
An di bang
An di flames staat fi trang

Di heat
An di smoke
An di people staat fi choke

Di screamin
An di cryinn
An di dyin' in di fyah...

Wi did know seh it coulda appn
You know - anytime, anywhey
Far don't it appn to wi
An di Asians dem a'ready?
But in spite a all dat
Ev'rybady woz still shack
Wen wi get di cole facks
Bout dat brutal attack
Wen wi fine out bout di fyah ovah New Craas
Bout di innocent lif dem whey laas
Bout di physically scaard
Di mentally mard
An dem relatives who tek it soh aad
An yu know, aldough plenty people woz surprised

Fi know seh dem kine a ting deh
Coulda appn to wi
Inna disya Great Britn
Inna Landan tiddey
And a few get frightn
An few get subdue
Allmost ev'rybady ad to sympahtise
Wid di love wans of di inju an di ded
Far disy massahkah mek wi come fi realise
It coulda be mi
It coulda be yu
Ar wan a fi wi pickney dem
Who fell victim to di terrah by night

But wait
Yu noh remembah
Ow di whole a black Britn did rack wid grief
Ow di whole a black Britn tun a melancally blue
Nat di passible blue af die murdahrah's eyes
But lik di smoke af gloom on dat cole sundey mawnin

But stap
Yu noh remembah
Ow di whole a black Britn did rack wid rage
Ow di whole a black Britn tun a fiery red
Nat di callous re af die killah's eyes
But red wid rage like di flames af di fyah

First di laafin
An di taakin
An di stylin in di pawty

Di movin
An a groovin
An dancin' to di disco

Di jokin
An di jivin
An di joy af di pawty

Den di panic
An di pushin
An di borin through di fyah

Di runnin'
An di jumpin'
An di flames dem risin' highah

Di weepin
An di moanin
O di harrow af di fyah...

Is a hellavva somting fi true yu know
Wat a terrible price wi haffi pay dough, mah
Jus fi live a lickle life
Jus fi struggle fi suvvive
Ev'ryday is jus worries an struggle an strife
Imagine, soh much young people
Cut aaf before dem prime
Before di twilite a dem time
Widoutn reasn nar rhyme
Kyaastin dis shadow af gloom ovah wi life

Look ow di police an die press
Try dem despahret bes
Fi put a stap to wi ques fi di trute
Yu membah? fus dem seh it could be arson
Den dem she parhaps nat
Fus dem seh a fyah-bam
Dem dem seh maybe nat
Dem imply it coulda white
Dem imply it coulda black
Who ripance fi di attack
Gense doze innocent young blacks

Instead raisin di alaam
Mek die public know wha gwaan
Plenty paypah print pure lie
Fi blind joe public eye
An di police dem plat an scheme
Canfuse an canceal
Mi hear seh
Even di poor payrence af die ded dm try fi use
But yu know
In spite a dem wicke praphaghanda
We refuse fi surrendah
To dem ugly innuendoh
Far up till now
Nat wan a dem
Needah Stakwell, needah Wilson nar Bell
Nat wan a dem can tell wi why
Nat wan a dem can tell mi who
Who tun dat night af joy intu a mawnin af sarrow
Who tun di jallity intu a ugly trajedy

First di comin'
An di goin'
In an out af di pawty

Di dubbin
An arubbin
An a rackin to di riddim

Di dancin'
An di scankin
An di pawty really swinging

Di laafin
An di taakin
An di stylin in di pawty

Di movin
An a groovin
An dancin' to di disco

Di jokin
An di jivin
An di joy af di pawty

Den di crash
An di bang
An di flames staat fi trang

Di heat
An di smoke
An di people staat fi choke

Di screamin
An di cryinn
An di dyin' in di fyah

Di panic
An di pushin
An di borin through di fyah

Di runnin'
An di jumpin'
An di flames dem risin' highah

Di weepin
An di moanin
O di harrow af di fyah