Song Search

De Hildegard ihr Yuccapalm

by Joana Emetz

on Als Frau in dem Metier (2000), Seitelange Liewesbriefe (2013)

Isch war schunn in de ganze Welt
Vum Grän Cänjon bis nach Kiel
Hab alles gsehe was mir gfällt
Aa de Nil
War mer nät zuviel
Isch hab Wind griggt vun de Azore
Un hab de Brode längscht geroche
Isch wees wo's Bernschteinzimmer is
Awwer 'sch sag's nät, 'sch habs's vaschbroch
Isch war drunne in de Antarktis
Isch war drowwe uffem Matschu Pitschu
Isch hab's Eis gseh vum Kilimandscharo
Un die Kilius uff de Schlittschuh

Awwer s'Schäänschte vum Meer bis uff die Alm
Des is de Hildegard ihr Yuccapalm

Isch bin in China uff die Mauer
In Marokko uff's Kamel
Isch war vorm Buckingham uff de Lauer
Un hätt se fascht gseh, moiner Seel
Isch hab gschtochert nach de Nessie
Im Newwel vun Loch Ness
Beim Ellwedritsche fange haww isch Dussl ghabt
In Mannem uff de Mess
Isch war uff die Schnelle
Uff de Seychelle
Un zwischedursch in Acapulco, des war foi
Isch hab's Ei gseh vum Kolumbus
Un die Lore uffem Ley iwwerm Rhoi

Awwer s'Schäänschte vum Meer bis uff die Alm
Des is de Hildegard ihr Yuccapalm

Isch kenn die Raschthöf un die Gaschthöf
Un zwischedursch manschi foini Hotelaasch
Isch kenn die Lohpiffer vun de Hotwollee
Un die Hollerboller uff de Belletaasch
Isch hab än Hai gseh
In de Südsee
Un än Butt, in Danzig an de Mol
Hab de Alän Delon aus de Näh gseh
Is jetzt a gerippelt wie än Rosekohl
Isch war uffm Fudschi un uff de Fidschi
Isch hab de Hund gseh vun Baskervill
Die Kaffeetass vum letschte Kaiser
Un die Yoko ohne Brill

Awwer s'Schäänschte vum Meer bis uff die Alm
Des is de Hildegard ihr Yuccapalm

Isch kenn de Amazonas ruff un runner
In Holland die Blumme un die Grachte
Ins Heidelberger Fass bin isch nunner
Un in Ratschapuri war isch am Verschmachte
Die Martina haww isch schpiele gseh
Bei de Auschträlien Open
De Papscht, mehr so dursch Zufall
Bei're Rundfahrt in de Tropen
Isch hab die Küsch gseh vum Bocüs -
Un jetzt mach isch mol än Schlenker -
Vum 'Kurpfalz-Radio' kenn isch alle Grüß
Die sin so schää, wie die Heimat vum Luis Trenker

Awwer s'Schäänschte vum Meer bis uff die Alm
Des is de Hildegard ihr Yuccapalm

Doch, was isch eisch jetzt noch sage muss
Geht mir schwer uff moi Gewisse
Isch will's eisch trotzdem aavertraue
Psst, die Hildegard, die derf's nät wisse:
Geschtern kumm isch zum Gebortsdag zu de Annelies -
Ä wahri Augenweide
Ihr Blummebank war iwwersäät
Mit lila Blumme vun de Lüneburger Heide
Do isses mit mir dursch
'sch war vor Begeischterung nimmi zu halde
Un nach dem Motto: De Rhoi fließt weiter
Ihr Leit, s bleibt nix beim Alde
Ruf isch:

"S Schäänschte vun Mannem bis Amerika
Annelies, des is doi Erika!"