Song Search

Atr El Hayah / قطر الحياة

by Ahmed Mekky أحمد مكّي

on Asloh Araby (2012)

[المقطع الأول]
في كل لفة عقرب ساعة عمري بيتسرسب بيعدي
الناس والدنيا بتتغير، حتى الحديد بيصدي
وأنا الوحيد واقف مكانى ثابت
في ناس اختارت سكة صابت، ناس تانية اختارت سكة خابت
إحساس قاسي وصعب لمّا الناس تشوفك فاشل
أبوك وأمك وإخواتك وصحابك شايفينك عاطل
قوم يابنى اسعى وحاول"، والله غلبت احاول"
ياما حاولت و قبل الجول ما ييجي يطلع فاول
معنديش مهارة وحتى كوسة وحوستى حوسة
ودوست بعد آخر البنزين بدوسة
في كل مقابلة شغلانة يتقالى لف نفسك بشهادتك
مدد بجمب اي حيط وخدلك بوسة
رجعت فلاش باك حسبت سنين عمري 30 سنة
لقيت حسبت تانى وتالت واتخضيت
ببص في المراية كم شعراية بيضة لقيت
وأبويا هو الى لسة بيصرف ع البيت
بتعامل من عيلتي على أني عالة
وحالتي حالة ثقتي بنفسي راحت النجاح بقى استحالة
نفسي أهرب من نفسي ومن حالتي و من عيلتي ومن الدنيا
نفسي ألقى دنيا تانية أهرب ليها ولا حتى ثانية
وفي يوم قالهالي صاحبي والى يدلك عالطريق
ميفدش صاحب غير صاحبو اسمع من الصديق
قالي في قعدة ضرب حلوة باليل عاملينها
"ساألتو: "هاش؟"، ضحك وقالى "بيسة" قولتله "لا منها
"قالي: "متخافش مش ممكن تدمن من أول شكة
اقنعني بالليل فعلا شكيت أول شكة
مفاصلي ساحت وارتاحت وروحي راحت
بكلم نفسي من جوة وبرغي من برة ساكت
همومي شبه تاهت والرؤية باهت في باهت
كل مشكلة كانت عندي في الدنيا ماتت وتاهت
عدّت ساعات في ثانية لقيت الصحبة قايمة
دخلت بيتى وش الفجر عيلتى كانت نايمة
دفنت نفسي تحت البطانية جسمى مثلج
نمت في أقل من ثانية نومت واحد مبنج

[اللازمة]
قطر الحياة بيعدى بسرعة، سنة فسنة فسنة
وأنا زي ما أنا من لما كان عندي سنة
هيا هيا الحياة هو هو أنا أنا
زهقت طهقت من الحياة تقدر تقول مليت أنا

[المقطع الثاني]
صحيت وفقت رجعت تانى للواقع والعكننة
عدّى النهار بطيء كأنو كم شهر وسنة
نفسى النهار يعدى بسرعة وأضرب تاني
ارجع ملك زماني بعيد ع العالم الى رماني
خلّوني أضرب معاهم كل يوم وبتعزم
خلاص دخلت السكة والطريق بيترسم
فجأنى صحبي في يوم قلهالى فى وشى خف تعوم
أجيب فلوس منين ليا وليك نضرب كل يوم
شخشخ جيبك ياأما من قعدتنا دى تكون محروم
من النهاردة مفيش ضرب ببلاش مفهوم؟ مفهوم
روّحت وتاني يوم فى معاد الضرب جسمي اتكهرب
كرابيج فى ظهري ومنخيرى سايلة وبتسرب
عاوز أضرب، منين اجيب فلوس؟ منين اجيب فلوس؟
بدأت استلف من كل الي اعرفة وأدوس
وحتى أخواتي خت منهم فلوس دروس
كلو كرهني وبيهرب منى تقلت على النفوس
خمسين جنيه فى خمسين فى مية في مية
بسرق يوماتي فلوس من البيت والكل شك فيا
نزلت بعت كل حاجة جاتلي فى يوم هدية
خلّصت فلوسي لحد فى يوم ماجتلى فكرة هيا هيا
هي: ذهب أمي، موبايل أختي، لاب توب أخويا
سرقتهم نزلت أهرب من البيت قابلت أبويا
حاول يمنعني مسكني من إيدي جامد زقيتو
أتخبط فى الحيط، و بصلى ازاى ابنو وأذيتو؟؟
خذ مني كل حاجة وتربس الباب غضب
سعتها طلبت اغرب حاجة ممكن تتطلب
عاوز فلوس حالا يأما هرتكب جريمة
أتهمنى بالجنون وأدانى كام شتيمة
ببان كل الأوض بتتفتح عيلتى بتتفرج
لسا بيستوعبوا يمكن دا جد يمكن بنهرج
سحبت بنت اختي 3 سنين ناحية شباك
هاتو الفلوس لرميها فجأة زاد الإرتباك
أمي بكت بحرقة قدامي فقت لثواني
!رميتلي فلوس وبصوت عالي: مشوفش وشك تانى
أمشى ملكش أم يا أبغض من شيطاني
خدت الفلوس و جريت عارف مش راجع بيتي تاني

[اللازمة]
قطر الحياة بيعدى بسرعة، سنة فسنة فسنة
وأنا زي ما أنا من لما كان عندي سنة
هيا هيا الحياة هو هو أنا أنا
زهقت طهقت من الحياة تقدر تقول مليت أنا

[المقطع الثالث]
كل اهلى وأصحابى بقيت وحيد
ومنين هجيب فلوس لازم ألقى طريق جديد
فجأة افتكرت جار من سني ساكن لوحدو طول عمرو
أبوه فى إعارة برة مصر وشهرى فلوس يبعتلو
شديتو زى ما اتشديت انا لنفس الطريق
لقيت مصدر فلوس جديد وبيت ولقيت صديق
نضرب سوا بفلوسو و في بيته ملناش ظهور
شقى سنين أبوة خلص كلو فى أربع شهور
وفى ليلة بنضرب جاتلو مكالمة مسدقهاش
أبوه عرف ان ابنة بيسرقه أتنقل إنعاش
كل عصب فى جسمى اتوتر زودت الجرعة اكتر
الجرعة المعتادة خلاص مبقتش تأثر
شريط حياتى بيتعرض قدامى أخبار فى اخبار
ضربت السّم فى عروقى وزودتة اكتر فى اكتر
نفسي أفنى وأخلص من الدنيا زى المية اتبخر
كمان زودت السم جسمي كله لون أصفر
صحبي أتفزع قام واتسرع مالك أصفر لية ياجدع
جسمك عرقان وبتترعش زى الى مل الحيا اتلدع
رغم أنى غرقان فى العرق جسمى متلج موجوع وجع
من خضتى جيت أصلب طولي جسمي على الأرض اترزع
جسمي رافض لكل أمر منى لقوة اتهد
والدنيا بتظلم تديرجى واحدة واحدة أسودت
أخر لقطة فى حياتى شفتها كانت مأساة
صحبى مرعوب وبيراقب فراقي للحياة

[اللازمة]
قطر الحياة بيعدى بسرعة، سنة فسنة فسنة
وأنا زي ما أنا من لما كان عندي سنة
هيا هيا الحياة هو هو أنا أنا
زهقت طهقت من الحياة تقدر تقول مليت أنا

[جسر]
عمري بسرعة انتهى
رجعت شريط حياتي ملقتش فيه حاجة عدلة تتذكرلي عملتها
حياتي راحت مني كلها ضيعتها
ندمان على كل لحظة غامقة فى يوم أنا عشتها
ياربّ أديني فرصة تاني أرجع للحياة
همشي فى طريقي صح لحد اخر منتهى
دي حاجة صعبة فعلا أنك تختفي من الدنيا
والناس متفتكركش بحاجة حلوة لوجة الله